BISMILLAH
*(13)➾ Halaal kamaai ke fawaaid wa barkaat*
Insaan zindagi guzaarne ke liye bahot si cheezon ka mohtaaj hai; sar chhupaane ke liye ghar ka zarooratmand hai to tan dhaankne ke liye kapde ka mohtaaj, zinda rehne ke liye roti bhi zaroori hai, goya roti, kapda, makaan insaan ki bunyaadi zaroorat hai.
Jo log Allah ko nahin pehchaante aur us par Imaan nahin rakhte woh apne maqsad ko haasil karne ke liye halaal wa haraam ka khayaal nahin rakhte, is liye woh sood bhi khaate hain aur sharaab bhi peete hain. Doosron ka maal hadap bhi karte hain aur tijaarat mein dhoka fareb se kaam lete hain. Lekin jo log Imaan waale hain un ke liye hargiz jaaiz nahin ke woh apni zarooriyaat ko poora karne mein aazaadaana rawayya ikhtiyaar karein un ke liye halaal wa paakeeza cheezon ko ikhtiyaar karna aur haraam wa naajaaiz kaamon se bachna intehaai zaroori hai. Khaas taur par apni kamaai aur rozi mein is baat ka khayaal rakhna bahot ahem hai. Har waqt yeh khayaal rakhna chaahiye ke us ke pet mein halaal hi luqma jaaye, haraam luqma na ja sake.
Huzoor ﷺ ne farmaaya: "Woh gosht Jannat mein na ja sakega jo haraam luqme se pala badha ho". Isi liye hadees paak mein halaal rozi ki talaash wa justaju ko farz bataaya gaya hai. Is halaal rozi ke beinteha barkaat wa fawaaid hain.
Halaal rozi ki barkat se dil mein noor paida hota hai aur nek aamaal ki taufeeq milti hai, aur duaaein qubool hoti hain. Rasoolullah ﷺ ne farmaaya: Be shak Allah Ta'ala paak hai aur paak hi ko qubool farmaate hain. (phir farmaaya ke) yaqeenan (halaal khaane ke baare mein) Allah Ta'ala ne paigambaron ko jo hukm farmaaya ke Rasoolo ! paak cheezein khaao aur nek kaam karo, wahi hukm momineen ko bhi diya ke aye Imaan waalo ! Jo paak cheezein ham ne tum ko di hain un mein se khaao. Us ke baad Huzoor ﷺ ne ek aise shakhs ka zikr kiya jo lamba safar kar raha ho, us ke baal bikhre huwe hon, jism par gard-o-gubaar ata huwa ho, aur woh aasmaan ki taraf haath uthhaaye huwe ya rab ya rab keh kar dua kar raha ho. Yeh shakhs dua to kar raha hai aur haal yeh hai ke us ka khaana haraam hai, peena haraam hai, pahenna haraam hai aur us ko haraam giza di gai hai, to in haalaat mein us ki dua kaise qubool hogi!
[Sahih Muslim: 2393]
Matlab yeh hai ke musaafir aur pareshaan aadmi ki dua qubool hoti hai. Magar haraam khaane peene ki wajah se us ki dua rad kar di jaati hai, aaj bahot se log dua qubool na hone ki shikaayat karte hain, un ko chaahiye ke pehle apna haal dekhein ke kaheen haraam aamdani ka istemaal to nahin ho raha hai, agar kisi bhi tarah se haraam aamdani zindagi mein daakhil ho gai to us ki dua ki qubooliyat ruki rahegi.
*(14)➾ Guftagu ke Aadaab*
Zabaan jism ka bazaahir ek chhota sa hissa hai, magar usi par insaan ke achchhe bure aamaal ka daaro madaar hota hai. Insaan ki sheereen kalaami aur saleeqa mand guftagu toote huwe dilon ko jod sakti hai, jab ke zabaan ka galat istemaal aur gair zimmedaaraana guftagu baahami taalluqaat ko khatm kar ke nafrat wa adaawat paida kar sakti hai. Isi ahmiyat ke peshe nazar Qur‘aan wa Hadees mein guftagu karne ke aise aadaab wa tareeqe bayaan kiye gaye hain, jin par amal karne se insaanon ke baahami taalluqaat ustawaar rehte hain aur zabaan ke galat istemaal se hifaazat hoti hai.
In hi aadaab mein se pehla adab yeh hai ke guftagu hamesha narmi se karne ki koshish karni chaahiye, kyun ke narm mizaaji aksar achchhaiyon aur bhaalaiyon ki jad aur bunyaad hai, isi wajah se Huzoor ﷺ ne farmaaya: Jo aadmi narmi se mahroom kar diya gaya woh saari bhalaaiyon se mahroom kar diya gaya.
[Sahih Muslim: 6765]
Doosra adab yeh hai ke jab koi baat kisi ko samjhaani ho, to guftagu thhaher thhaher kar karni chaahiye, taake baat sunne waale ko achchhi tarah samajh mein aasake, Hazrat Aaisha RaziyAllahu anha farmaati hain ke Huzoor ﷺ ki baat juda juda hoti thi, jis ko har sunne waala samajh leta tha.
[Abu Daawood: 4839]
Teesra adab yeh hai ke guftagu umooman aahistagi aur munaasib aawaaz ke saath karni chaahiye, be mauqa cheekh cheekh kar baatein karna, himaaqat wa jahaalat ki nishaani hai, Allah Ta'ala ne Qur'aan mein Hazrat Luqmaan Alaihissalam ki zabaani guftagu aur bolchaal ka tareeqa is tarah sikhaaya hai: "Aur apni aawaaz zara past rakh, sab aawaaz se buri aawaaz gadhon ki hoti hai".
[Sura-e-Luqmaan: 19]
Chautha adab yeh hai ke guftagu mukhtasar aur baamaqsad honi chaahiye, kyun ke mukhaatab lambi baat Sunne se ukta jaata hai, ek dafa ek shakhs ne taweel khutba diya, Hazrat Amr bin Aas RaziyAllahu anhu ne suna, to farmaaya: Agar yeh shakhs mukhtasar baat karta, to is ke liye behtar hota, kyun ke main ne Huzoor ﷺ se suna hai ke Aap ﷺ ne farmaaya: Mujhe hukm diya gaya hai ke main guftagu mein ikhtesaar ikhtiyaar karoon, kyun ke ikhtesaar behtar hai.
[Abu Daawood: 5008]
Paanchwaan adab yeh hai ke guftagu hamesha dil aazaari, la'an ta'an, geebat wa bohtaan aur tanz wagaira se paak honi chaahiye, kyun ke ahaadees mein in cheezon se bachne ki sakht taakeed aai hai aur aisi baaton ko ikhtiyaar karne waalon ke haq mein sakht waeed bayaan hui hai.
In ke alaawa bahot saare aadaab hain, jin ko ikhtiyaar karna aur jin ko apni rozmarrah guftagu mein ikhtiyaar karna har insaan ke liye zaroori hai, jo shakhs in cheezon par amal karta hai us ke ta‘alluqaat achchhe rehte hain aur baahami ulfat wa muhabbat badhti hai aur aapsi naaittefaaqiyaan door hoti hain.
*(15)➾ Raaste se takleefdeh cheez ko hataana*
Hamaara Deen Islaam bahot hi achchha mazhab hai, yeh hamein achchhe kaamon ka hukm deta hai aur chhoti chhoti baaton ke baare mein bhi hamaari rehnumaai karta hai. Islaam mein raaston ko saaf suthra rakhna aur khaas taur par raaste se takleef dene waali cheez ko hata dena sawaab ka kaam hai.
Hazrat Abu Barza Aslami Raziyallahu Anhu ne Huzoor ﷺ se arz kiya: Ya Rasoolallah ! Mujhe koi aisi cheez sikha deejiye, jis se main faaida uthhaaun. Aap ﷺ ne irshaad farmaaya: Musalmaanon ke raaste se takleefdeh cheez ko hata diya karo.
[Sahih Muslim: 6839]
Ek hadees mein Huzoor ﷺ ne farmaaya: *"Imaatatuhul azaa anit tareeqi sadaqah".*
* Tarjama:* Aadmi ka raaste se takleefdeh cheez ko hata dena sadqa hai.
[Abu Daawood: 1285]
Jo log raaste ki safaai suthraai ka khayaal rakhte hain aur aisi cheezon ko hata dete hain, jis se guzarne waalon ko takleef pahonchti ho, to Allah Ta‘ala un se bahot khush hote hain aur unhein bahot ziyaada sawaab ata karte hain.
Ek martaba hamaare Nabi ﷺ ne yeh waaqia bayaan farmaaya ke ek shakhs raaste par chal raha the, us ne ek jagah zameen par kaantedaar tehni padi hui dekhi, to us ne logon ko takleef se bachaane ke liye us tehni ko raaste se hata diya. Allah Ta'ala ko us ka yeh amal itna pasand aaya ke us bande ki magfirat farmaadi.
[Sahih Muslim: 6835]
Ham bhi is par amal karein. Agar raaste par koi gandagi padi hui mile, ya koi aisi cheez ho, jis se raasta chalne waalon ko takleef pahonch sakti ho jaise: kaanta, patthar, keel, kaanch ka tukda aur phalon ke chilke wagaira, jis se phisalne ya thhokar lagne ka khatra ho, us ko hata dena chaahiye, taake logon ko raasta chalne mein kisi tarah ki pareshaani na ho. Yeh badi neki aur sawaab ka kaam hai.
16)➾ Deen-e-Islaam*
Islaam Deen-e-Fitrat hai, yeh Allah ka bheja huwa Deen hai, yeh har waqt hamaari rehnumaai karta hai aur hamein seedhi sachchi raah dikhaata hai. Islaam hamein sikhaata hai ke Allah ek hai, us ka koi shareek wa saajhi nahin, us ke maan baap nahin hai, us ki koi aulaad nahin hai, woh hamesha se hai aur hamesha rahega, woh beniyaaz hai. Aur Hazrat Muhammad Mustafa ﷺ Allah ke aakhri Nabi aur Rasool hain, Aap ﷺ ke baad ab koi nabi nahin aayega, Aap ki nubuwwat rehti duniya tak ke liye hai, agar Aap ke baad koi nubuwwat ka daawa karega to woh jhoota hoga. Aur Qur'aan Majeed Allah Ta'ala ki aakhri kitaab hai jo logon ki hidaayat ke liye utaari gai hai.
Ab qayaamat tak insaanon ka Deen "Islaam" hai. Isi ko apnaane mein Deen wa duniya ki bhalaai hai, yahi Allah ka pasandeeda Deen hai, Islaam ke alaawa koi aur Deen wa mazhab Allah ke yahaan maqbool nahin hai. Khud Allah Ta'ala ne irshaad farmaaya: Beshak (motabar) Deen to Allah ke nazdeek Islaam hi hai.
[Sura-e-Aale Imraan: 29]
Allah Ta'ala ne irshaad farmaaya: Jo koi shakhs Islaam ke siwa koi aur Deen ikhtiyaar karna chaahega, to us se woh Deen qubool nahin kiya jaayega aur aakhirat mein un logon mein shaamil hoga jo sakht nuqsaan uthhaane waale hain.
[Sura-e-Aale Imraan: 85]
Allah Ta'ala ne Deen-e-Islaam ko Aap ﷺ par mukammal kar diya hai, Allah Ta'ala ne apni kitaab mein Deen ke mukammal ho jaane ki khush khabri di hai. Ab is mein kisi kami ya ziyaadati ki gunjaaish nahin hai. Allah Ta'ala ka irshaad hai: Aaj main ne tumhaare liye tumhaara Deen mukammal kar diya, tum par apni nemat mukammal kar di aur tumhaare liye Islaam ko Deen ke taur par (hamesha ke liye) pasand kar liya.
[Sura-e-Maaida: 3]
Woh hamein zindagi guzaarne ka achchha tareeqa sikhaata hai, har mod par hamaari behtar rehnumaai karta hai, Islaam mein tamaam khoobiyaan aur bhalaaiyaan maujood hain, har achchhi baat ki taaleem deta hai aur har buri baat se mana karta hai. Huzoor ﷺ ne to yahaan tak farmaaya ke main is liye bheja gaya hoon ke akhlaaqi khoobiyon ko kamaal tak pahonchaadoon.
[Musnade Ahmad: 8952]
Hindustaan ka ek baadshaah guzra hai, us ka naam Akbar tha. Us ke dimaag mein yeh galat khayaal saraayat kar gaya tha ke (na‘oozubillah) Huzoor ﷺ ke Deen ki kul muddat ek hazaar saal thi jo poori ho gai, isi liye woh dil khol kar Islaami ahkaam ko baatil karne mein mashgool ho gaya tha aur is ke liye us ne ek khud saakhta mazhab "Deen-e-ilaahi" ki bunyaad rakhi thi, jis mein dher saari kharaabiyaan theen, us deen mein daakhil hone waalon se jo kalima padhwaaya jaata tha, us mein *"Laa ilaaha illallaahu"* ke saath *"Akbaru khaleefatullaah"* bhi shaamil kiya jaata tha, shaahi mahal mein naaqoos bajaaye jaate aur aag raoshan ki jaati thi, magar Namaaz, Rozah, Haj, aur Zakaat se laaparwaahi barti jaati thi, balke deewaan khaane mein kisi ki majaal na thi elaaniya namaaz padhe, Maqaam-e-Nubuwwat ki tauheen ki gai aur Meraaj wagaira ka mazaaq udaaya gaya, baadshaah ko Sajda-e-Ta‘azeem kiya jaata, Qaanoon-e-Nikaah mein tabdeeli ki gai, tadfeen ke tareeqe badal daale, mulaaqaat ke waqt salaam karne ki jo Islaami taaleem thi, us ko khatm kar ke naya tareeqa raaij kiya, baaz cheezein jo halaal theen, un ko haraam keh diya gaya aur baaz cheezein jo haraam theen, un ko halaal keh diya, suwwar ko paak samjha jaane laga, ulama, mujtahideen aur Islaami sha‘aair ka mazaaq udaaya jaane laga, hatta ke sooraj wagaira ki parastish bhi ki jaane lagi.
Akbar ki is bad deeni aur Islaam se doori mein us waqt ke darbaari ulama ki galat sohbat aur khushaamad ko bada dakhal tha, un mein Mulla Mubaarak ke do ladke Abul Fazl aur Faizi sar-e-fehrist the. Mash‘hoor buzurg Shaikh Ahmad Sarhindi Mujaddid Alfe Saania Rahmatullah Alaih usi zamaane ke the, unhon ne badi hikmat ke saath is naye mazhab "Deen-e-ilaahi" ka muqaabla kiya aur is baare mein bade kaarnaame anjaam diye.
17)➾ Sunnat par amal karna*
Insaan ki sab se badi khush naseebi yeh hai ke woh apni poori zindagi ko Allah ke Rasool Hazrat Muhammad ﷺ ke tareeqe ke mutaabiq guzaare, jo shakhs Aap ﷺ ki sunnat par amal karta hai, Allah Ta'ala us se khush hote hain. Sunnat ke mutaabiq apni poori zindagi guzaarne ka ek bahot bada faaida yeh hota hai ke Jannat mein ham ko hamaare Nabi Hazrat Muhammad ﷺ ke saath rehna naseeb hoga. Aap ﷺ ne irshaad farmaaya: *“Man ahyaa sunnatee faqad ahabbanee wa man ahabbanee kaana ma’ee filjannah."*
* Tarjama:* Jis shakhs ne meri sunnat ko zinda kiya (yaani us par amal kiya aur logon mein us ko raaij kiya) us ne mujh se muhabbat ki aur jis ne mujh se muhabbat ki, woh mere saath Jannat mein hoga.
[Tirmizi: 2678]
Sahaaba-e-Kiraam RaziyAllahu Anhum Aap ﷺ ki ek ek sunnat par paabandi se amal kiya karte the, kisi bhi haal mein kisi bhi sunnat ko chhodna unhein hargiz gawaara nahin tha. Jaahiliyat mein log apne izaar ko takhne se neeche latka kar chalte the aur is ke zariye apni badaai zaahir kiya karte the, Huzoor ﷺ ne is bure fel se mana farma diya aur takhne se oopar izaar rakhne ka hukm diya. Sahaaba-e-Kiraam RaziyAllahu Anhum is par sakhti se amal karte the.
Sulah Hudaibiyah ke mauqe par Huzoor ﷺ ne Hazrat Usmaan RaziyAllahu anhu ko Makkah bheja. Woh apne chacha zaad bhaai Abbaan bin Saeed ki panaah mein Makkah gaye, jab Makkah pahonche to Abbaan bin Saeed ne kaha: Aye chacha zaad bhaai ! Aap mujhe bahot tawaazo aur aajizi waali shakl wa soorat mein nazar aarahe hain, zara izaar ko takhne se neeche latka leejiye (taake kuchh badaai ki shaan paida ho). Hazrat Usmaan RaziyAllahu anhu aadhi pindli tak lungi baandh rakhi thi, unhon ne farmaaya: Hamaare mahboob ﷺ ka lungi baandhne ka yahi tareeqa hai. (Is liye main lungi takhne se neeche nahin kar sakta) Chunaanche woh usi haal mein rahe.
[Musannaf Ibne Abi Shaiba: 36852]
Hamein bhi Aap ﷺ ki har ek sunnat par amal karna chaahiye. Sote jaagte, khaate peete, chalte phirte har waqt har amal mein Aap ﷺ ki sunnat aur Aap ﷺ ke bataaye huwe tareeqe ka poora khayaal rakhna chaahiye. Jo shakhs Aap ﷺ ki sunnat par amal nahin karta hai aur Aap ﷺ ke bataaye huwe treeqe par nahin chalta hai, to us se Allah Ta'ala aur Huzoor ﷺ naaraaz hote hain.
(18)➾ Saamaan ka aib na chhupaana*
Insaan ko zindagi mein rozmarrah jin kaamon se waasta padta hai un mein ek bahot hi ahem kaam khareedna bechna bhi hai. Isi se zindagi ki gaadi chalti hai. Bazaahir yeh ek dunyawi kaam hai aur ek insaani zaroorat hai. Magar is kaam ko anjaam dene mein agar Allah ke hukmon ka khayaal aur Rasoolullah ﷺ ki roshan hidaayaat ki paasdaari ki jaaye to yeh dunyawi zaroorat ibaadat ban jaayegi aur ibaadat bhi us aala darje ki ke aadmi ko Ambiya, Shohada aur Siddeeqeen ke darje wa maqaam tak pahoncha de, chunaanche Rasoolullah ﷺ ka irshaad hai: Poori sachchaai aur imaandaari ke saath kaarobaar karne waala taajir Nabiyon, Siddeeqon aur Shohada ke saath hoga.
[Tirmizi: 1209]
Khareed-o-farokht mein taajir ke liye imtehaan ka marhala yeh hota hai ke woh saamaan bech raha hota hai us mein basa auqaat aib aur nuqs hota hai aur us aib ki wajah se us ki qeemat kuchh ghat jaati hai. Aise waqt mein ek taajir ki zimmedaari hai ke bechte waqt saamaan ke aib ko zaahir kar de aur khareedne waale ko bata de ke is mein yeh nuqs wa kami hai, is mein bazaahir nuqsaan nazar aayega, lekin haqeeqat mein duniya wa aakhirat ka nafa isi mein posheeda hai, is tarah karne se kaarobaar mein bhi barkat hogi aur Allah ki naaraazgi se bach jaayega kyun ke Rasoolullah ﷺ ka irshaad hai ke jis shakhs ne koi aib waali cheez kisi ke haath farokht ki aur khareedaar ko woh aib batla nahin diya to us par hamesha Allah ka gazab rahega. Aur Allah ke farishte hamesha us par laanat karte raheinge.
Rasoolullah ﷺ ne beche jaane waale saamaan ka aib chhupaane se mana bhi farmaaya hai, chunaanche Hazrat Abu Hurairah RaziyAllahu anhu se riwaayat hai ke Rasoolullah ﷺ galle ke ek dher ke paas se guzre (jo ek dukaandaar ka tha) Aap ne apna haath us dher ke andar daakhil kar diya, to aap ki ungliyon ne geelapan mehsoos kiya, Aap ne us galla farosh se farmaaya ke (tumhaare dher ke andar) yeh tari aur geel kaisi hai? Us ne arz kiya: Ya Rasoolallah ! Galle par baarish ki boondein pad gai theen (to main ne oopar ka bheeg jaane waala galla neeche kar diya) Aap ne farmaaya ke is bheege huwe galle ko tum ne dher ke oopar kyun nahin rehne diya taake khareedne waale log is ko dekh sakte, (sun lo) jo aadmi dhoke baazi kare woh ham mein se nahin.
[Sahih Muslim: 295]
Har musalmaan taajir ko apni tijaarat mein shariat ka paas wa lihaaz rakhna chaahiye, is se hamaari nekiyon mein izaafa hoga aur Allah Ta'ala ki naaraazgi ham se hategi aur hamaari madad wa nusrat ke faisle aasmaanon se utreinge. Duniya bhi banegi aur aakhirat bhi chamkegi.
(19)➾ Hijri taareekh ki ahmiyat*
Aam taur par do qism ke calender istemaal kiye jaate hain:
(1) Hijri
(2) Eiswi.
(1) Hijri
(2) Eiswi.
Eiswi taareekh ki ibtida Hazrat Eisa Alaihissalam ki paidaaish se hoti hai na ke wafaat se, kyun ke un ki wafaat nahin hui balke Allah Ta'ala ne un ko aasmaan par zinda uthha liya hai, qayaamat ke qareeb woh logon ki hidaayat wa rehnumaai ke liye aasmaan se utreinge, hamaare Nabi ﷺ ki shariat par khud bhi amal kareinge aur logon ko bhi us par amal karaaeinge.
Aur Hijri taareekh ki ibtida hamaare pyaare Nabi ﷺ ki hijrat se hoti hai, hijri taareekh baazaabta taur par Hazrat Umar RaziyAllahu Anhu ne naafiz farmaaya, jab un ke paas kuchh khutoot aaye aur un ko taareekh ke etebaar se rakhne ki zaroorat pesh aayi, to Hazrat Umar RaziyAllahu Anhu ne Sahaaba-e-Kiraam RaziyAllahu Anhum se is silsile mein mashwara kiya ke Islaami taareekh ki ibtida kab se honi chaahiye, logon ne kai tarah ki raaye di, Hazrat Ali RaziyAllahu Anhu ne yeh raaye di ke Islaami taareekh ka aagaaz hijrat se hona chaahiye. Isi ko sab ne pasand kiya aur isi par sab ka ittefaaq ho gaya aur hijrat se hi Islaami taareekh ki ibtida hui.
Hijri taareekh ka daaro madaar chaand par hai, chaand bhi waqt maaloom karne ka ek zariya hai, Qur’aan-e-Kareem mein Allah Ta'ala ka irshaad hai: Log aap se naye maheenon ke chaand ke baare mein poochhte hain, Aap unhein bata deejiye ke yeh logon ke (mukhtalif muaamlaat ke) aur Haj ke auqaat muta’ayyan karne ke liye hain.
[Sura-e-Baqarah: 189]
Hijri taareekh bahot ahem hai, us par bahot saare ahkaam ki bunyaad hai, maslan Islaam ka ek ahem rukn Haj hai jo Zil Hijjah ki makhsoos taareekhon mein hi ada kiya jaata hai, Eidul Fitr aur Eidul Azha chaand ki taareekh ke etebaar se manaai jaati hai, isi tarah musalmaanon par jo roze farz hai woh Ramazaan mein rakhe jaate hain.
Huzoor ﷺ ka irshaad hai: Chaand dekh kar roze rakho aur chaand dekh kar rozah rakhna chhod do, agar chaand nazar na aaye to Sha'abaan ke tees din mukammal karlo.
[Sahih Bukhaari: 1909]
Is ke alaawa bhi bahot saare ahkaam hijri taareekh ke etebaar se anjaam paate hain, is liye hamein hijri taareekh ki hifaazat karni chaahiye, aur is ko yaad rakhna chaahiye aur apne rozmarrah ke kaamon mein is taareekh ka istemaal karna chhahiye.
(20)➾ Safaai Suthraai ka ehtemaam karna*
Har Insaan fitri taur par safaai suthraai ko pasand karta hai aur hamesha saaf suthra rehne ki koshish karta hai, Deen-e-Islaam ne deegar ahkaam ke saath safaai ko bhi khaas ahmiyat di hai, Huzoor ﷺ ne irshaad farmaaya: Paaki aadha Imaan hai.
[Sahih Muslim: 556]
Safaai suthraai Allah ko bahot pasand hai aur Allah Ta'ala saaf suthra rehne waalon ko pasand karte hain aur log bhi un ko achchhi nigaah se dekhte hain. Huzoor ﷺ ne apne gharon, apne kapdon aur apne badan ko saaf suthra rakhne ki hidaayat di hai.
Aap ﷺ ka irshaad hai: Allah Ta'ala paak hain, paaki ko pasand karte hain, woh saaf suthre hain aur safaai suthraai ko pasand karte hain, woh karam karne waale hain aur karam ko pasand karte hain, woh nihaayat hi sakhi hain aur sakhaawat ko pasand karte hain, tum apne sehnon ko saaf suthra rakho aur yahoodiyon ki mushaabahat ikhtiyaar na karo.
Hazrat Jaabir RaziyAllahu anhu kehte hain ke ek din Rasoolullah ﷺ hamaare paas tashreef laaye, to Aap ﷺ ne wahaan ek shakhs ko dekha jis ke baal paraaganda bikhre huwe the, Aap ﷺ ne farmaaya: Kya is shakhs ko woh cheez (kanghi wagaira) mayassar nahin, jis se woh apne baalon ko durust kar le, isi tarah Aap ﷺ ne aise shakhs ko dekha jis ke badan par maile kuchaile kapde the, Aap ﷺ ne farmaaya: Kya is aadmi ko woh cheez (saaban pani wagaira) mayassar nahin jis se woh apne kapdon ko dho daale.
[Abu Daawood: 4062]
Is liye safaai aur suthraai aur tahaarat wa nazaafat ka poora khayaal rakhein, apna kapda, apna bistar aur apne badan ki safaai par dhyaan dein, apne kapdon ko mitti aur siyaahi ke dhabbon se bachaaein, haath aur munh saaf karne ke liye apne paas rumaal rakh lein, aasteen ya daaman se munh saaf na karein, har hafte naakhun taraash lein aur gusl ka ehtemaam karein, rozaana subah sawere nahaane se achchhi tarah nazaafat bhi haasil ho jaati hai aur sehat wa tandurusti bhi barqaraar rehti hai, miswaak ka bhi ehtemaam karein, wuzu karte waqt, khaana khaane ke baad, raat ko sone se pehle aur subah so kar uthhne ke baad miswaak kar liya karein, saath hi apne gharon ki safaai ka khayaal rakhein, ghar ke atraaf ko saaf suthra rakhein, gali koochon aur sadkon par kachra ya koi aur gandagi bilkul na daalein, is se aane jaane waalon ko takleef hoti hai aur beemaariyaan bhi phailti hain.
*(21)➾ Kaainaat mein gaor-o-fikr karna*
Qur'aan-e-Kareem mein insaanon ko kaainaat ki cheezon mein gaor-o-fikr karne ki daawat di gai hai. Allah Ta'ala ka irshaad hai: Aur aasmaan wa zameen mein jo kuchh hai, sab ko us ne apni taraf se tumhaare kaam mein laga rakha hai. Yaqeenan us mein un logon ke liye badi nishaaniyaan hain jo gaor-o-fikr se kaam lein.
[Sura-e-Jaasiyah: 13]
Kaainaat ki cheezon mein gaor-o-fikr karne se Allah Ta'ala ki bemisaal kaareegari ka ilm hota hai, us ki zaat wa sifaat ki taraf rehnumaai milti hai, us ki ma’arifat haasil hoti hai, neez is baat ka bhi ilm hota hai ke Allah Ta'ala ne chhoti chhoti cheezon mein bhi insaanon ke liye kitne bade faaide rakhe hain. Is tarah in cheezon se sahi taur par faaida uthhana bhi aasaan ho jaata hai.
Musalmaanon mein beshumaar log aise guzre hain jinhon ne duniya ki cheezon mein gaor-o-fikr kar ke ahem maalumaat logon tak pahonchaai hain, nayi nayi cheezein banaeen, insaanon ki sahoolat aur taraqqi ke liye bunyaadi cheezein eejaad keen. Musalmaanon mein aise beshumaar science daan guzre hain, jinhon ne science ke maidaan mein ahem kaarnaame anjaam diye hain. Misaal ke taur par Muhammad bin Moosa Al Khawaarzami hain, jin ki wafaat 850 Eiswi mein hui hai, jo Hisaab wa Riyaazi ke bade maahir the, "Aljebra" unhon ne hi eejaad kiya hai, ginti ke jo aadad: 1, 2, 3, 4, 5, 6, 7, 8, 9, ki shakl istemaal karte hain, un ko sab se pehle unhon ne hi bayaan kiya, is se pehle adad likhne ka jo tareeqa tha woh bahot hi mushkil tha. Unhon ne sifar (0) ka ta'aruf karaaya, warna is se pehle sifar ka istemaal nahin hota tha.
Isi tarah Abu Bakr Muhammad bin Zakarya Ar Raazi hain, jin ki wafaat 923 Eiswi mein hui, bahot bade tabeeb aur maahir doctor the, sab se pehle unhon ne hi saabit kiya ke chechak aur khasra alag alag beemaariyaan hain. Unhon ne ilaaj ke kai naye tareeqe bayaan kiye, paare ka lep aur behoshi laane waali dawaaein eejaad keen, jis ko operation ke waqt istemaal kiya jaata hai.
Isi tarah Abul Qaasim Khalaf bin Abbaas Az Zahraawi hain, jin ki paidaaish 1030 Eiswi mein hui, unhein surgery ka moojid kaha jaata hai, woh pehle surgeon hain jinhon ne operation kiya aur jinhon ne operation ke zariye bachche ki wilaadat ka tareeqa eejaad kiya, zakhmon ko taankne ke liye munaasib dhaagon ko istemaal karna un hi ki eejaad hai, unhon ne surgery ke bahot se aalaat bhi eejaad kiye hain.
In ke alaawa bhi musalmaanon mein bahot saare ilm-o-fan ke maahir guzre hain, jinhon ne beshumaar bade bade kaarnaame anjaam diye hain, jaise Jaabir bin Hayyaan, Abu Ali Husain bin Abdullah bin Seena, Abu Ali Hasan bin Husain bin Haisam, Gayaasuddin Abul Fatah Umar bin ibrahim Al Khayyaam, Abu Raihaan Muhammad bin Ahmad Al Bairooni wagaira yeh sab hazraat science ki eejaadaat mein bahot mash'hoor wa ma'aroof hain.
*(22)➾ Masnoon duaaon ka ehtemaam karna*
Rasoolullah ﷺ ne mukhtalif auqaat mein jo duaaein maangi aur mukhtalif mawaaqe par ummat ko taaleem di hai, woh nihaayat hi baabarkat hain. Maslan neend se bedaar ho kar padhne ki dua, baitulkhala mein jaane se pehle ki dua, wahaan se baahar nikalne ke baad ki dua, wuzu karte waqt, Masjid mein daakhil hote waqt, Masjid se nikalte waqt, ghar mein daakhil hote waqt, khaana khaane se pehle aur khaana khaane ke baad, azaan ke baad, kapde pahente waqt, aaina dekhte waqt, bistar par pahonch kar sone se pehle wagaira.
Aur is tarah khaas khaas maoqon par jo duaaein sikhaai gai hain ya is ke alaawa jo doosri aam duaaein hadeeson mein manqool hain, jo kisi waqt aur haalaat ke saath khaas nahin hain, woh sab duaaein bahot hi ahem aur jaame hain. Poori ummat ke haq main Deen wa duniya ki khair wa bhalaai aur hamaari tamaam zarooraton ke liye intehaai mufeed hain. Yeh duaaein itni achchhi aur jaame hain ke agar ham saari umr sochte rahein, tab bhi aisi duaaein khud se nahin maang sakte, yahi to wajah thi ke Sahaaba-e-Kiraam RaziyAllahu anhum Arabi zabaan wa lugat mein maahir hone ke baawajood Aap ﷺ ke paas aate the aur duaaein seekhte the.
Chunaanche ek martaba Hazrat Abu Bakr Siddiq RaziyAllahu anhu Huzoor ﷺ se darkhwaast ki : Ya Rasoolallah ! Mujhe dua ke chand aise kalimaat bata deejiye, jin ko main subah wa shaam padh liya karoon. Aap ﷺ ne farmaaya: Kaho :
اَللَّهُمَّ فَاطِرَ السَّمَوَاتِ وَالْأَرْضِ، عَالِمَ الْغَيْبِ وَالشَّهَادَةِ، رَبَّ كُلِّ شَيْءٍ وَمَلِيكَهُ، أَشْهَدُ أَنْ لَّآ إِلَهَ إِلَّا أَنْتَ أَعُوذُ بِكَ مِنْ شَرِّ نَفْسِي وَشَرِّ الشَّيْطَانِ وَشِرْكِهِ
*Allahummaa ! Faatiras samaawaati wal arzi, aalimal gaibi wash-shahaadati, rabba kulli shai-in wa maleekahoo, ash-hadu allaa ilaaha illa anta a’oozubika min sharri nafsee wa sharrish-shaitaani wa shirkih"* aur farmaaya: Jab tum subah karo, jab shaam karo aur jab sone ke liye bistar par leto, to in kalimaat ko keh liya karo.
[Abu Daawood: 5067]
Ham logon ko bhi yeh duaaein achchhi tarah yaad kar leni chaahiye aur inhein mukhtalif auqaat mein padhte rehna chaahiye.
*(23)➾ Jhooti gawaahi na dena*
Gawaahi dar'asl us amaanat ki adaaigi ka naam hai, jo gawaahi dene waale ke paas us qaziyye aur muaamle ke baare mein sahi soorat-e-haal ke ilm aur sachchi baat ki shakl mein maujood hai jis ke baare mein woh gawaahi de raha hai. Goya gawaahi dene waala apni baat mein sachcha hota hai, is liye gawaahi dene waale ko sach ka daaman nahin chhodna chaahiye. Aur apne maqaam wa martabe ka paas wa lihaaz rakhna chaahiye ke Allah Ta'ala ne Qur‘aan Majeed mein na sirf Ambiya aur Malaaika ke liye shaahid aur shaheed ke alfaaz istemaal kiye hain, balke khud apne aap ko bhi is lafz se yaad kiya hai. Alaawah azeen Hadees-e-Paak mein Rasoolullah ﷺ ne gawaahon ka ikraam karne ka hukm diya hai. Kyun ke gawaahon ke bayaan se hi haq wa baatil aur sahi wa galat mein imtiyaaz hota hai, is liye gawaahon ko apni baat mein sachchaai ikhtiyaar karni chaahiye ke jhoot bolna bahot bada gunaah hai.
Hadees-e-Paak mein jhooti gawaahi dene ko kabeera gunaah bataaya hai aur us ki buraai wa kharaabi bataai gai hai. Chunaanche Rasoolullah ﷺ ne ek din subah ki namaaz padhi, jab Aap namaaz se faarig huwe to ek dam khade ho gaye aur farmaaya ke jhooti gawaahi Allah ke saath shareek thhehraane ke baraabar kar di gai hai, yeh baat aap ne 3 dafa irshaad farmaai aur Sura-e-Haj ki yeh aayat tilaawat farmaai
فَاجۡتَنِبُوا الرِّجۡسَ مِنَ الۡاَوۡثَانِ وَ اجۡتَنِبُوۡا قَوۡلَ الزُّوۡرِ حُنَفَآءَ لِلّٰہِ غَیۡرَ مُشۡرِکِیۡنَ بِهٖ ؕ
[Sura-e-Haj: 30]
(Buton ki yaani but parasti ki gandagi se bacho aur jhooti baat kehne se bachte raho, sirf ek Allah ke ho kar raho kisi ko us ke saath shareek na karte huwe.)
[Abu Daawood: 3599]
Ek doosri Hadees mein hai ke Aap ﷺ ne ek din Sahaaba RaziyAllahu Anhum se irshaad farmaaya aur teen dafa irshaad farmaaya: Kya main tum ko bataaoon ke sab se bade gunaah kaon kaon se hain? Phir Aap ﷺ ne farmaaya: Allah ke saath shirk karna, maan baap ki naafarmaani karna aur muaamlaat mein jhooti gawaahi dena aur jhoot bolna, Raawi ka bayaan hai ke pehle Aap sahaara lagaaye huwe baithhe the lekin phir seedhe ho kar baithh gaye aur baar baar Aap ﷺ ne is irshaad ko dohraaya, yahaan tak ke ham ne kaha ke kaash ab aap khaamosh hojaate. Yaani us waqt Aap par aisi kaifiyat taari thi aur Aap aise josh se farma rahe the ke ham mahsoos kar rahe the ke Aap ke Qalb-e-Mubaarak par is waqt bada bojh hai, is liye ji chaahta tha ke us waqt Aap khaamosh ho jaaein aur apne dil par itna bojh na daalein.
[Sahih Bukhaari: 2654]
Aap ﷺ ne jhooti gawaahi ki qabaahat jahaan apne mubaarak irshaad se bataai, waheen apne amal se bhi zaahir farmaaya ke yeh kitna sakht aur bura amal hai. Allah Ta'ala hamein is buraai ka ehsaas ata farmaaye aur is gunaah se hamaari hifaazat farmaaye.
*(24)➾ Waalidain ko na Sataana*
Jis tarah maan baap ki farmaanbardaari karna, un ke saath achchha sulook karna, un ki khidmat karna aur unhein hamesha raahat wa aaraam pahonchaana bahot badi neki aur sawaab ka kaam hai, isi tarah un ki naafarmaani karna, un ke saath bura sulook karna, un ko takleef pahonchaana ya kisi aur tarah un ko sataana, bahot bada gunaah hai; chunaanche ek riwaayat mein Rasoolullah ﷺ ne Shirk ke baad sab se bada gunaah waalidain ko sataana aur un ki naafarmaani karne ko qaraar diya hai.
Jo shakhs apne maan baap ko sataata hai, ya kisi bhi tarah se un ka dil dukhaata hai, un ki baatein nahin maanta aur un ki naafarmaani karta hai, to Allah Ta'ala aur Huzoor ﷺ us se sakht naaraaz hote hain aur Allah Ta'ala use duniya mein bhi saza dete hain aur aakhirat mein bhi us ko bahot sakht saza deinge.
Ek hadees mein Aap ﷺ farmaaya: Tamaam gunaahon mein se Allah Ta'ala jitna chaahte hain maaf farma dete hain, lekin maan baap ko sataane ka gunaah aisa hai ke Allah Ta'ala us gunaah ke karne waale ko maut se pehle duniya hi ki zindagi mein saza de dete hain.
[Sho'abul Imaan: 7890]
Ek doosri hadees mein Huzoor ﷺ ne farmaaya: Waalidain ki naafarmaani karne se bacho, kyun ke Jannat ki khushbu ek hazaar saal ki doori se mahsoos hoti hai. Allah ki qasam! Waalidain ka naa-farmaan us ki khushbu bhi nahin soongh paayega.
[Tabraani Ausat: 5664]
Lihaaza ham logon ko bhi apne waalidain ki naafarmaani karne aur unhein kisi bhi tarah ki takleef pahonchaane se bachna chaahiye, agar ham apne waalidain ko takleef pahonchaaeinge, to Allah Ta'ala ham se naaraaz ho jaaeinge aur duniya wa aakhirat mein bahot sakht saza deinge.
*(25)➾ Gaali galoch se bachna*
Islaam ne zabaan ki hifaazat karne aur us ko galat istemaal se bachaane ka hukm diya hai, ek sachche pakke momin ki shaan yeh hai ke woh narm mizaaj aur sheereen kalaam karne waala hota hai, us ki zabaan se gandi baatein, gaali galoch aur akhlaaq se gire huwe alfaaz nahin nikalte, woh kisi ko taana nahin deta aur na woh kisi par laanat karta hai.
Hazrat Abdullah bin Mas'ood RaziyAllahu Anhu se riwaayat hai ke Rasoolullah ﷺ ne irshaad farmaaya: Momin taana dene waala, laanat karne waala, gandi baatein karne waala aur behaya nahin hota.
[Tirmizi: 1977]
Sahaaba-e-Kiraam RaziyAllahu Anhum apni zabaan ki bahot hifaazat karte the, kabhi bhi fahash baat apni zabaan se na nikaalte. Hazrat Jaabir bin Sulaim RaziyAllahu anhu farmaate hain ke main jab Madeenah aaya, to dekha ke ek badi shakhsiyat hai, sab log un ki raaye maante hain, woh jo bhi farmaate hain us par amal karte hain. Main ne logon se poochha ke yeh kaon hain? Logon ne bataaya ke yeh Allah ke Rasool hain, Main ne Aap ﷺ ki khidmat mein haazir ho kar arz kiya: *Alaikas salaamu yaa rasoolallaah !* Do martaba aisa kaha. Aap ﷺ ne farmaaya: *Alaikas salaamu* mat kaho, kyun ke *Alaika* mayyit ke liya kaha jaata hai, tum *Assalaamu alaika* kaho,.....
Main (Hazrat Jaabir bin Sulaim RaziyAllahu anhu) ne kaha : Kya aap Allah ke Rasool hain? Aap ﷺ ne farmaaya: Main Allah ka Rasool hoon, jo aisi qudrat waala hai ke agar tum ko koi takleef pahonch jaaye, phir tum us se dua karo, to woh tumhaari takleef ko door karde, agar tum ko qahat saali pahonch jaaye aur tum us se dua maango, to woh tumhaare liye (galla) ugaade aur jab tum kisi chatyal maidaan mein ho, jahaan ghaas, paani aur aabaadi na ho aur aise maoqe par tumhaari sawaari gum ho jaaye, phir tum us se dua karo, to tumhaari sawaari tumhaare paas lauta de. Main ne arz kiya: Mujhe kuchh naseehat farmaaiye, Aap ﷺ ne farmaaya: Kisi ko gaali mat dena, Hazrat Jaabir bin Sulaim RaziyAllahu anhu kehte hain ke us ke baad main ne kabhi kisi aazaad ya gulaam shakhs ya oont ya bakri ko gaali nahin di. Phir teen naseehaton ke baad farmaaya:.... Agar koi shakhs tum ko gaali de aur tum par us cheez ka aib lagaaye jo tumhaare andar hai, to tum us par us cheez ka aib na lagaao jo tum us ke andar jaante ho, kyun ke us ka wabaal to usi par hoga.
[Abu Daawood: 4084]
Gaor karein ke is hadees mein kitni sakhti ke saath kisi ko gaali dene se mana kiya gaya hai aur jis sahaabi ko mana farmaaya, unhon ne kabhi bhi kisi insaan hatta ke kisi jaanwar ko bhi gaali nahin di. Allah Ta'ala hamein bhi un ki itteba karne ki taufeeq ata farmaaye. Aameen
*(26)➾ Allah Ta’ala par bharosa*
Allah Ta'ala saari kaainaat ke Khaaliq-o-Maalik hain, saare aalam ka nizaam tanhe tanha khud chala rahe hain, is Kaarkhaana-e-Aalam mein jo kuchh kisi ko milta hai woh usi ke hukm aur faisle se milta hai. Agar woh kisi ko kuchh dena chaahe aur saari duniya ke log mil kar us ko mahroom karna chaahe to woh us ko hargiz mahroom nahin kar sakte. Agar woh kisi ko mahroom kar dena chahe aur saari duniya ke log mil kar us ko nawaazna chaahein to woh us ko hargiz nawaaz nahin sakte.
Maaloom huwa ke asl nawaazne waali zaat Allah ki hai aur asl mahroom karne waali zaat Allah ki hai. Haan hamein duniya mein jo chezein dikhaai deti hain aur ehsaas hota hai un cheezon se hamein zarooriyaat mil rahi hain, woh darasl asbaab aur zaraaye hain, un ki haisiyat is ke siwa kuchh nahin hai ke woh cheezon ke ham tak pahonchne ke liye Allah hi ke muqarrar kiye huwe sirf zariye aur raaste hain jis tarah ke gharon mein paani jin nalon ke zariye pahonchta hai woh paani pohnchaane ke sirf zariye aur raaste hain, paani ki taqseem mein un ka apna koi dakhal aur koi hissa nahin hai, isi tarah is aalme wujood mein kaarfarmaai asbaab ki bilkul nahin balke kaarfarma aur muassir sirf Allah Ta'ala ki zaat aur us ka hukm hai.
Is haqeeqat par dil se yaqeen kar ke apne tamaam maqaasid aur kaamon mein sirf Allah Ta‘ala ki zaat par etemaad aur bharosa karna, usi se law lagaana, usi ki qudrat aur usi ke karam par nazar rakhna, usi se ummeed ya khauf hona aur usi se dua karna wagaira ka naam tawakkul hai. Zaahiri asbaab wa tadaabeer ko chhod dena tawakkul ke liye laazim nahin hai. Balke asbaab ke hote huwe bhi Allah par bharosa aur etemaad karna chaahiye.
Allah Ta'ala par tawakkul wa etemaad ki ahaadees mein badi taakeed aayi hai aur us ki fazeelat bataai gai hai, chunaanche Rasoolullah ﷺ irshaad farmaaya ke meri ummat mein se 70,000 bagair hisaab ke Jannat mein jaaeinge. Woh woh bandagaane khuda honge jo mantar nahin karaate, shugoone bad nahin lete aur apne parwardigaar par tawakkul karte hain.
[Sahih Bukhaari: 6472]
Ek aur hadees mein tawakkul ki targeeb dete huwe Rasoolullah ﷺ ne irshaad farmaaya ke agar tum log Allah par aisa tawakkul aur aisa etemaad karo jaisa ke us par tawakkul karne ka haq hai to tum ko woh is tarah rozi de jis tarah parindon ko deta hai, woh subah ko bhooke apne aashiyaanon se nikalte hain aur shaam ko pet bhare waapas aate hai.
[Tirmizi: 2344]
*(27)➾ Nek kaamon mein sabqat karna*
Nek log hamesha ziyaada se ziyaada sawaab haasil karne aur khair ke kaamon mein badh chadh kar hissa lene ki koshish karte hain, woh har waqt yeh sochte rehte hain ke kaise Allah ki ibaadat, un ki yaad, taqwa wa parhezgaari, khidmat-e-khalq aur sadqa-o-khairaat mein sab se aage badh jaayein aur Jannat ke oonche oonche darje haasil kar lein, kisi se peechhe reh jaana un ko gawaara nahin hota, yeh ek bahot achchhi sifat hai, har musalmaan ke andar yeh shauq aur jazba hona chaahiye.
Qur’aan-o-Hadees mein nek kaamon mein sabqat karne ki taaleem di gai hai. Allah Ta'ala ka irshaad hai: Tum nek kaamon mein ek doosre se aage badhne ki koshish karo.
[Sura-e-Baqrah: 148]
Rasoolullah ﷺ ne farmaaya: Mashgool hone se pehle nek aamaal mein jaldi kiya karo.
[Ibne Maaja: 1081]
Sahaaba-e-Kiraam RaziyAllahu anhum ke dil mein ziyaada se ziyaada sawaab haasil karne ka shauq wa jazba koot koot kar bhara huwa tha, woh nek kaamon mein badh chadh kar hissa late the, ek dafa ka zikr hai ke kuchh gareeb Sahaaba RaziyAllahu anhum pyaare Nabi ﷺ ki khidmat mein aaye aur arz kiya: Ya Rasoolullah! Maaldaar log Jannat ke oonche oonche darje haasil kiye jaarahe hain (aur ham log gareebi ki bina par us se mahroom ho jaate hain)
Rasoolullah ﷺ ne poochha: Woh kaise? Unhon ne jawaab diya ke ham log namaaz padhte hain aur woh bhi namaaz padhte ham, ham rozah rakhte hain aur woh bhi rozah rakhte hain, magar woh log sadqa-o-khairaat karte hain aur ham us nek kaam se mahroom reh jaate hain, woh gulaam aazaad karte hain aur ham gulaam aazaad nahin kar sakte (is tarah un ki nekiyaan ham se badh jaati hain)
Huzoor ﷺ ne farmaaya: Kya main tumhein aisi cheez na bataadoon, jis par tum amal kar ke un logon ke sawaab ko paaloge jo tum se aage nikal rahe hain aur sawaab mein un logon se aage nikal jaaoge jo tum se peechhe hain? Un Sahaaba ko badi khushi hui, Unhon ne kaha: Ya Rasoolullah! Zaroor bata dijiye,
Huzoor ﷺ ne farmaya: Har namaaz ke baad
33 martaba *Subhaanallaah*
33 martaba *Alhamdulillaah*
33 martaba *Allaahu Akbar* aur
10 martaba *Laailaahaa illallaah*
padh liya karo.
33 martaba *Subhaanallaah*
33 martaba *Alhamdulillaah*
33 martaba *Allaahu Akbar* aur
10 martaba *Laailaahaa illallaah*
padh liya karo.
Un gareeb Sahaaba RaziyAllahu anhum ne us ko har namaaz ke baad paabandi ke saath padhna shuru kiya, jab un maaldaar Sahaaba RaziyAllahu anhum ko us ki khabar hui to woh log bhi un kalimaat ko har namaaz ke baad paabandi se padhne lage, aakir unhein bhi to ziyaada se ziyaada sawaab haasil karne ki khwaahish thi.
Jab gareeb Sahaaba RaziyAllahu anhum ko maaloom huwa ke maaldaaron ne bhi is ko padhna shuru kar diya to woh bade fikrmand huwe ke ab phir un ka sawaab ham logon se badh gaya, chunaanche woh fog phir Huzoor ﷺ ki khidmat mein haazir huwe aur arz kiya ke ya Rasoolullah! Yeh kalimaat to maaldaar log bhi padhne lage, ab phir woh log sawaab mein aage badhte jaarahe hain. Huzoor ﷺ ne farmaaya: Yeh to Allah ka fazl hai jis ko chaahte hain ata karte hain.
[Sahih Muslim: 1375]
*(28)➾ Rishwat lene aur dene waale*
Maal-o-Daulat Allah Ta'ala ki badi nemat hai use Allah ke hukm ke mutaabiq hi kamaana aur kharch karna chaahiye, Qayaamat ke roz insaan se is ke baare mein bhi poochha jaayega ke maal kahaan se kamaaya aur kahaan kharch kiya? Is liye maal haasil karne aur us ke kharch karne mein sharee'at ka khoob paas wa lihaaz rakhna chaahiye aur us ki khilaaf warzi se bachte rehna chaahiye. Agar maal ko galat tareeqe se haasil kiya gaya ya naajaaiz jaghon mein kharch kiya gaya to dunyawi zindagi mein bechaini ka sabab aur aakhirat mein sakht wabaal ka zariya hoga.
Maal ke haasil karne ke beshumaar zaraaye aur us ke kharch karne ke muta'ddad maqaamaat hain. Magar sab jaaiz aur pasandeedah nahin, balke baaz naajaaiz aur sakht naapsandeedah hain. Minjumla un ke ek rishwat lena aur dena bhi hai. Rishwat lene dene sharee’at mein bada gunaah aur Allah ki laanat ka sabab hai. Jaisa ke Hadees paak mein waarid huwa hai ke Rasoolullah ﷺ ne laanat farmaai rishwat dene waale aur rishwat lene waale par.
[Abu daawood: 3580]
Matlab yeh hai ke Rasoolullah ﷺ ne rishwat lene waalon aur rishwat dene waalon se apni intehaai naaraazgi wa bezaari ka izhaar farmaaya aur un ke liye baddua farmaai ke Allah un ko apni rehmat se mehroom kar de. Allah ki panah! Rehmatul Lil Aalameen, Shafeeul Muznibeen ﷺ jis bad naseeb se bezaari ka elaan farmaaye aur us ke liye rehmate khudaawandi se mehroom kiye jaane ki bad dua farmaaye us bad bakht ka kya thhikaana!..........
Lihaaza hamein rishwat lene aur dene se door rehna chaahiye aur hamesha haq wa insaaf ka daaman thaame rehna chaahiye. Neez rishwat ke kisi muaamle mein darmiyaani aadmi ka kirdaar ada karne se bhi bachna chaahiye. kiyun ke Rasoolullah ﷺ ne rishwat lene aur dene waale ke alaawa us darmiyaani aadmi (dalaal) par bhi laanat farmaai hai jo rishwat ke len den ka zariya aur waasta bane.
*(29)➾ Maatahaton ke saath husne sulook*
Insaan ko apne maatahaton ke saath achchha bartaao karna chaahiye, maslan koi shakhs kisi qaum ka ameer ho ya kisi mulk ka baadshah ho, to un ke liye laazim hai ke apne maatahat logon ke saath husne sulook kare un ke saath insaaf kare, zulm-o-ziyaadati na kare, un ke aaraam wa raahat ka khayaal rakhein, un ki zarooratein poori kiya karein. Yeh Islaam ki ahem taaleem hai, hamaare Nabi ﷺ ne irshaad farmaaya: Jis bande ko Allah Ta'ala kisi ra'iyyat ka haakim wa nigraan banaaye aur woh us ki poori poori khair khwaahi na kare, to woh haakim Jannat ki khushbu bhi na pa sakega.
[Sahih Bukhaari: 7150]
Ek Hadees mein Aap ﷺ ka irshaad hai: Jo hukmaraan zaroorat mandon aur kamzoron ke liye apna darwaaza band karege to Allah Ta'ala us ki haajat, us ki zaroorat aur us ki miskeeni ke waqt aasmaan ke darwaaze band kar lega. (yaani zaroorat ke waqt Allah Ta‘ala ki taraf se us ki madad nahin hogi).
[Tirmizi: 1332]
Ek doosri Hadees mein Aap ﷺ ne farmaaya: Jo shakhs meri ummat mein se kam ya ziyaada afraad ka haakim aur nigraan bane, phir un ke darmiyaan insaaf na kare, to aise haakim ko Allah Ta'ala aundhe munh Jahannam mein daal dega.
[Tabraani Kabeer: 517]
Hindustaan ke mugal hukmaraanon mein ek baadshah jahaangeer ke naam se mashhoor hai, woh adl-o-insaaf ko itni ahmiyat deta tha ke unhon ne Agra ke qile mein ek zanjeer latka di thi jiska doosre kinaara baahar sadak par the aur us ne yeh elaan kar diya tha ke jis shakhs ke saath adaalat mein insaaf na huwa ho woh is zanjeer ko kheenche. Us ke kheenchne se mahal mein ghantiyaan bajti theen aur baadshah khud us ki shikaayat sunne aajaata tha.
Mugal hukmaraanon mein hi ek baadshah ka naam Aurangzeb Aalamgeer hai, woh bahot akhlaaqmand the, apni riaaya ke saath behtareen sulook karte the, adl-o-insaaf karne waale aur apni riaaya ki raahat wa sukoon ka khayaal rakhne waale the, kisi par zulm un ko gawaara na tha, woh kam umri se hi mulk ke bade bade kaam anjaam dete the....
Mugal hukmaraanon mein hi ek baadshah ka naam Aurangzeb Aalamgeer hai, woh bahot akhlaaqmand the, apni riaaya ke saath behtareen sulook karte the, adl-o-insaaf karne waale aur apni riaaya ki raahat wa sukoon ka khayaal rakhne waale the, kisi par zulm un ko gawaara na tha, woh kam umri se hi mulk ke bade bade kaam anjaam dete the....
(30)➾ Chugalkhori ka wabaal*
Kisi shakhs ki aisi baat doosron ko pohnchaana jis ki wajah se doosra shakhs us se badgumaan ho jaaye aur aapsi taalluqaat kharaab ho jaayein, *"Chugalkhori"* kehlaata hai. Chugalkhori intehaai buri aadat hai aur chugalkhor ka anjaam bahot bura hai, isi liye Islaam ne is se bachne ki taaleem di hai, Chugalkhori aisi buri aadat hai ke is ki wajah se baaz martaba poori qaum museebat mein mubtila ho jaati hai.
Huzoor ﷺ ne chugli ki bahot mazammat bayaan ki hai aur chugalkhoron ko bure logon mein shumaar farmaaya hai. Ek martaba Aap ﷺ ne farmaaya: Allah ke behtareen bande woh hain jin ko dekh kar Allah yaad aaye aur badtareen bande woh hain jo chugliyaan khaane waale, doston mein judaai daalne waale hain aur jo log is koshish mein lage rehte hain ke paak daaman bandon ko kisi gunaah ya pareshaani aur museebat mein mubtila kar dein.
[Musnade Ahmad: 17998]
*Ref:* Deeniyat Course book
